Í eina tíð hevur Vágs Kommuna arbeitt við eini heilt serstakari og forkunnugari verkætlan. Talan er um at gera økið kring Vatnið til eitt savanaøkið, har alskyns djór kunnu liva frítt í tí vøkru náttúruni. Savanaðin fer at rúma bæði tey vanligu føroysku djórini, men eisini forkunnug djór, sum vanliga ikki síggjast í Føroyum.

Økið kring Vatnið er eitt sera náttúruvakurt stað í Vági, sum dregur nógv fólk til sín – bæði vágbingar og vitjandi. Her síggjast dagliga nógv djór, og nógv fólk ganga regluliga eftir rásini rundan um Vatnið fyri at fáa rørslu og njóta náttúruna. Hetta vil kommunan nú byggja enn meira uppá við hesi spennandi verkætlan.

Ein savana í Vági

Í longri tíð hava starvsfólk hjá kommununi arbeitt við verkætlanini, og kommunan hevur fingið stóran fíggjarligan stuðul – bæði úr Føroyum og uttanlands – sum ger, at verkætlanin gerst veruleiki. Somuleiðis hava jarðareigarar kring Vatnið latið ognir til verkætlanina.

Verkætlanin snýr seg um at umgyrða alt økið við lagaðum gøðrum, hegni og náttúrligum girðingum, soleiðis, at djórini fáa frítt at ferðast, men samstundis ikki sleppa út um savanaðina. Eisini verða gjørdar rásir, sum fólk kunnu nýta til gongu ella á súkklu, so tey kunnu koma í tætt samband við djórini.

Bilar sleppa í avmarkaðan mun inn á økið. Savanaðin fevnir eisini um Eiðisveg, sum gongur til ítróttarøkið á Eiðnum og víðari til Vágseiði, og økið norðanfyri vegin. Á Eiðisvegi verða slúsur settar, sum tryggja, at djórini ikki sleppa út, men samstundis geva bilum møguleika at koyra ígjøgnum. Slúsurnar verða settar við Vatnið – har Bøgøta møtir Eiðisveg – og aftur við kampingøkið. Bilførarar kunnu koyra inni á savanaøkinum og fóðra djórini úr bilvindeyganum, eins og í kendu safariparkini Giveskud Zoo í Danmark.

Djórini í savanaðini

Í savanaøkinum í Vági fara nógv av teimum vanligu føroysku djórunum at liva. Veðrar, ær og smálomb verða sjálvskrivað, eins og dunnur, hønir og svanar. Men ætlanin er eisini, at lamaðir, geitir og reinsdjór skulu flyta inn. Harumframt verða ymisk sløg av sílum, m.a. ælabogasíl, slept í Vatnið fyri at gera djóralívið undir vatnskorpuni meira fjølbroytt.

Vágs Kommuna hevur eisini eitt samstarv við djóraserfrøðingar hjá København Zoo. Endamálið er at fáa flamengofuglar at støðast í økinum og seinni eisini at fáa aðrar framandar fuglar til Vágs, sum serfrøðingarnir meta hóskandi til føroyska veðurlagið.

Klárt í summar

Mánadagin fer borgarstjórin, Bjarni Johansen, at seta fyrsta spakan í jørðina, og í næstu vikunum fara arbeiðsmenn og undirveitarar í gongd við at gera økið klárt. Miðað verður eftir, at fyrstu djórini flyta inn í juni, meðan flamengofuglarnir – tvey pør við ungum – koma fyrstu viku í juli.

Okur í Vágs Kommunu eru sera spent uppá, hvussu verkætlanin fer at eydnast, og hvussu djórini fella til í teirra nýggja umhvørvi. Serliga eri jeg spentur at síggja ljósareyðu fuglarnar, sum koma í juli. Okur fara at kunna loypandi um, hvussu arbeiðið gongur, á heimasíðuni vagur.fo, sigur borgarstjórin Bjarni Johansen.