Samstørv og vinarbýir
Vágs kommuna hevur víttfevnandi samstarv við allar kommunurnar í Suðuroy, sum eitt nú fevnir um Bú- og heimatænastuna í Suðuroy og barnaverndartænastuna. Vágs kommuna er eisini limur í interkommunalu felagsskapunum IRF og SEV, og er eisini limur í Kommunufelag Føroya. Vágs Kommuna er eisini stólt av at verða samstarvsfelagi við Fólkaheilsustýrið og ABC átakið.
Kommunufelagið røkir áhugamálini hjá kommununum mótvegis lands- og ríkismyndugleikum við at luttaka í arbeiðsbólkum, har mál, sum hava við kommunurnar at gera, eru til viðgerðar. Starvsfólk Kommunufelagsins ráðgeva og vegleiða kommunalpolitikarum og kommunalum starvsfólkum í almennum spurningum eins og í ivamálum.
Meira kunning á www.kf.fo.
IRF er ein interkommunalur renovatiónsfelagsskapur, sum allar kommunur í Føroyum, við undantaki av Tórshavnar kommunu, eiga og reka í felag. Virksemið hjá IRF fevnir um øki hjá teimum 28 limakommununum í felagnum.
Virksemið hjá IRF fevnir um:
- Innheintan av húsarhalds – og virkisburturkasti
- Endurvinningarhøll
- Móttøkuhøll
- Brennistøð
- Reinsitænastu
- Oljureinsiverk
- Handfaran av serliga dálkandi burturkasti
- Móttøku- og tyrvingarpláss í Trøllavík í Suðuroy
- Jarnendurnýtslu á Gjánoyri í Norðstreymoy
- Bilvrakpláss í Klaksvík, Sandoy og Suðuroy
- Bilverkstaður í Klaksvík
Meiri kunning á www.irf.fo.
Elfelagið SEV er interkommunalur felagsskapur, sum allar kommunur í Føroyum eiga, og tí allir føroyingar eiga.
SEV er skipað sum lutafelag við partafelagslíknandi aðalfundi, nevnd og dagligari leiðslu.
Hvør limakommuna verður umboðað á aðalfundinum við eini fulltrú, og atkvøðurætturin samsvarar íbúgvaratalinum í kommununi. T.v.s. at ein atkvøða er fyri hvørt byrjað 1000 íbúgvaratal.
Í nevndini sita sjey limir, ein úr hvørjum av hesum økjum: Norðoyggjum, Eysturoy, Sundalagnum/Norðstreymoy, Vágum, Suðurstreymoy, Sandoy og Suðuroy. Hvørt øki sær velur ein nevndarlim og ein varalim. Nevndin skipar seg sjálv.
Meiri kunning á www.sev.fo.
Vágs kommuna var ein av fyrstu samstarvsfeløgunum hjá Fólkaheilsustýrið í ABC verkætlanini fyri sálarliga heilsu.
Hvat er so ABC?
ABC fyri sálarliga heilsu er ein sálarliga heilsufremjandi ætlan, ið roynir at fáa einstaklingin at fara í gongd við at røkja og fremja sálarligu heilsuna hjá sær sjálvum og øðrum. Ein týðandi partur snýr seg eisini um at skapa karmar fyri trivnaðarfremjandi virksemi í samstarv við feløg, kommunur og stovnar.
Virkin Vágur
Virkin Vágur var eitt av størri tiltøkunum, har Vágs kommuna tók ABC við og vísti á týdningin um kroppsliga og sálarliga heilsu.
Meira kunning um ABC fæst á www.folkaheilsa.fo.
Vágs kommuna hevur vinarbýarsamstarv við kommununa Sandgerðisbær í Íslandi.
