Vágs kommuna - Vágsvegur 30 - Tlf. 663000 - email: vagur@vagur.fo

Graslíkisvøllurin á Eiðinum alment tikin í nýtslu ónsdagin

18. juni 2018

Nýggi graslíkisvøllurin á Eiðinum verður alment tikin í nýtslu ónsdagin 20. juni 2018 kl. 17.00.

Í hesum sambandi verður hátíðarløta á Eiðinum har Eydis Kjærbo, forkvinna í Mentunarnevndini hjá Vágs kommunu flytur fram røðu. Síðani fara fótbólts-landsliðsleikarar úr nærumhvørvinum at taka nýggja vøllin í nýtslu saman við einum gomlum VB-leikara.

Aftaná verður brotssparkskapping saman við U11 dreingjum og U11 gentum hjá FC Suðuroy og vinnarin fær steyp. Og síðani verður bjóðað kaffi, te og okkurt gott afturvið í VB-húsinum.

Graslíkisvøllurin, sum nú er lagdur á vesturi á Eiðinum, er tann triðji graslíkisvøllurin í røðini. Tann fyrsti varð lagdur á í 1987. Hesin vøllurin varð skiftur í 2004, og nú 14 ár seinni, er so aftur nýggjur graslíkisvøllur lagdur á vesturi á Eiðinum.

Graslíkisvøllurin er av slagnum DOMO og frá IDE-Møblum, sum er umboð hjá DOMO í Føroyum, og eru hetta mest vanligu graslíkisvallir í Føroyum.

Tiltakið byrjar kl. 17 ónsdagin 20. juni 2018.

Last modified: 19. juni 2018